Kapen ushtarë iranianë në qytetin Hims

---

Ushtria Siriane e Lirë, ka publikuar një video në internet në të cilën shfaqen forca iraniane, të zëna pikërisht nga kjo ushtri, në qytetin Hims. Të zënë rob flisnin persisht, mbanin karta identiteti iraniane dhe pohonin se janë sjellë në Siri për të shtypur protestat popullore.

Njëri prej tyre i kërkon autoriteteve iraniane që të bëjnë çmos për lirimin e tij dhe të kolegëve të tjerë.

Vlen të citojmë se një zyrtar i lartë në gardën revolucionare të Iranit, ka deklaruar më parë për kanalin televiziv Alarabia, se Irani ka një bazë ushtarake në Zejdani, pranë Damaskut.

Po personalitete të Ushtrisë Siriane të Lirë, kanë deklaruar se regjimi i Asad, ka ndërmend ta ndajë Sirinë dhe ta zhysë në një luftë sektare të pafund. Sipas tyre, regjimi po armatos ithtarët e sektit alevit me armë zjarri, si parapërgatitje për konfliktin sektar, pas të cilit Siria do të ndahet. Vetë dhuna dhe vrasjet çnjerëzore ndaj familjeve sunite në Hims, pa përjashtuar dhe foshnjat e fëmijët, është tregues i këtij plani. /ardhmeriaonline/

---